推薦序　毋通放棄，咱猶有愛情　　　　　◎鄭順聰

譯者序　行佇這段「傲慢佮偏見」的歲月　◎洪淑昭

?

1-61章

推薦序



毋通放棄，咱猶有愛情

鄭順聰



　　見若講著「西洋文學經典」，咱世俗人就會起緊張，目頭結結，掠做這冊深無底，讀都讀袂完，是咱一世人攏行袂入去的世界。



　　掠這款「偏見」來讀珍．阿斯頓是講袂通的，伊所寫的，是咱厝邊頭尾發生的大細項代誌，親切掛趣味，一點仔都袂艱難，一下點就通通通。



　　譬如咱這馬欲來讀的《傲慢佮偏見》，故事四常仔四常，就是佇兩百外冬前的英國，有一位班奈太太，規工用心計較欲共伊五?查某囝嫁出去。現代的讀者著愛知，彼時的英國社會和古早時的台灣仝款，做一?查某人，人生的任務就是揣一?好翁，生囝扞家到老。

　　真正是無公平的代誌，煞是彼?時代的現實。



　　就佇這時，班奈家所徛的庄跤所在，有一位叫賓利的好額人少爺講欲來附近蹛，這予班奈太太規?人精神隨來，想空想縫欲和伊熟似交陪。班奈太太的五?查某囝袂輸五張牌，只要有一張查某囝仔牌和賓利先生?頭做一對，這phe-sih（pair）拍出去，伊做老母的這場局，就贏一半矣。



　　本底想講賓利這緣投仔骨是一粒一的，和大漢查某囝仔珍是真四配，佇舞會遨遨跳的時，雄雄踅一位達西出來，這位少年家嘛是緣投仔兄，手骨閣較粗，人煞激一?氣，真苛頭，有影是「傲慢」。達西先生和次女伊俐莎白因為誤會來熟似，就按呢兩?人膏膏纏，冤家囉和解啦起風波，有時踮花園講，有時寫落落長的批，成做《傲慢佮偏見》的主線。



　　這本西洋文學經典上了不起的，是作者共故事鋪排甲有條有段，精彩甲予人毋甘共冊放落。這場婚姻的牌局激來激去，激出男男女女的各種性地，有時戇膽、有時閉思，這時激五仁，換一?所在就假仙假觸。內底的人臆來臆去，掠做是按呢煞毋是，當面開破無夠閣補批兩三回，一項簡單的代誌愈舞愈貓，愈看是愈笑詼。咱讀者徛戲台跤看，看台頂的人有影是戇，好好鱟?甲屎流，真毋值。



　　呔會按呢！是時代的制限？社會的禮防？人性的生成？



　　這就是《傲慢佮偏見》仙讀都袂??的原因之一，按怎想都想袂透，論都論袂了。活跳跳的人物，真拄真的對話，會興會牢的情節，是古典款的純情青春夢啊！



　　珍．阿斯頓的筆路幼膩??變竅，文句牽絲攀藤，定定有「附加子句」做倒鉤，規句讀完捎無意思，愛?轉去閣讀一擺。彼時英國人講話定著好禮雅氣，愛斟酌聽才通知影真正的意思，有時去予詈顛倒毋知，話句厚心機，講話實在有夠鹹（kiam）。



　　人物的關係纓纓纏纏，故事線路彎彎曲曲，咱的台文譯者洪淑昭真有牽挽，共原文全翻做二十外萬字台文，和珍．阿斯頓仝款了不起。



　　全本是終其尾會來出版的，猶毋過，2023 年這時的勢面，台文讀者和市草的塗肉猶未培好，驚種甲傷早無對時。所致，淑昭就來改寫做十萬捅字的「好讀版」，掠故事主要的枝骨，共人物和背景補入去，予讀者較快較順來讀小說，勻勻仔行入去台語文和珍．阿斯頓的美麗世界。



　　《傲慢佮偏見》台語好讀版和華語濟濟的出版品，有真濟無仝：第一是?氣的台文，並華語加足心適的，那親像咧看八點擋連續劇。淑昭共原文的華彩膨紗?（liu）開，用伊的理路重繡，束結、貫串、燒烙，含（kam）淑昭款的頂真，閣有高雄在地的話語，氣口十足。而且，淑昭有踮伊的台語課讀予學生聽，讀過一擺閣一擺，是有實際讀唸過，毋但是紙面翻的喔，予這好讀版和讀者掠閣較峇。



　　出版社嘛真貼心，好禮仔來錄有聲冊，請台語小丸子、前衛版《小王子》的配音郭雅瑂老師扞頭，組團隊綿精綿爛來錄廣播劇，加上心陪有聲、杰瑞音樂的專業製作，有影是聲緣好、袂跳針。



　　相信珍．阿斯頓佇天頂聽著伊俐莎白講台語，嘛會喙笑目笑，台文該當遮爾仔?閣有局。像我，去予班奈太太倯甲有力的話?著笑筋，對珍和賓利彼款枵鬼假細膩氣甲惱甲，拄著達西對伊俐莎白告白彼葩，雄雄忽然間我無法度喘氣矣??。



　　著愛相信，愛情永遠佇遐，毋通放棄，因為《傲慢佮偏見》，予咱踮這茫茫渺渺的世界，猶原相信愛情的力量。

?