推薦序
共墜落的靈魂釘根佇台灣土地——讀柯柏榮詩集《記持開始食餌》
這是詩人柯柏榮的第四本台語詩集，離進前三本詩集《娘仔豆的春天》（台南：海翁，二??七）、《赤崁樓的情批》（台南：台南市立圖書館，二??九）、《內籬仔的火金姑》（台南：台南縣文化局，二?一?）的出版，時間算來已經不止仔久矣。
柯柏榮是國內誠出名的台語詩人，自二??三年開始自修台語文學的創作，伊佮別人仝款是伊對詩有熱情、有向望，寫作真勤；佮人無仝的，是伊的詩頭起先攏是佇內籬仔（監牢）寫的，前三本詩集就是監牢內底的產物。用監牢經驗做底蒂，伊寫出一般詩人無法度寫出來的詩，所以嘛予人稱呼做「監獄詩人」。
台灣上早的「監獄詩人」是日本時代的楊華（一九??——一九三六），佇一九二七年因為涉嫌違反日本政府「治安維持法」入獄，就捌佇獄中寫出予人真感動的詩集《黑潮集》。柯柏榮卻是因為少年時錯誤的認知，一時懵懂袂曉想， 兩擺觸犯強盜罪入獄，頭尾加起來倚十七冬，到二??九年才假釋出獄。
好佳哉伊佇內籬仔遇著貴人，參加合唱團，綴黃南海學聲樂，唱台灣藝術歌曲，讀台語詩集，才來徹底改變伊的個性參人生。詩，特別是台語詩的創作，予伊佇絕望的內籬仔揣著希望的光。就親像伊彼時寫的詩句所寫：「鐵窗邊一枝柑仔樹葉尾溜 / 垂吊一粒必巡的娘仔豆 / 我靜靜等待 / 等待雨停 / 等待出日 / 等待美麗的蝶仔 / 破繭而出 / 飛向藍天。」
自二?一?年出版詩集《內籬仔的火金姑》到今，十冬過去，柯柏榮攏無閣出詩集，毋過伊猶原有咧寫，有咧發表，嘛參加過誠濟文學獎，有著獎，嘛有落選，總是遮的詩篇攏是伊性命的印記，會當看出伊想欲用詩來救贖家己的決志，家己栽一欉台語詩的樹欉，共墜落的靈魂釘根佇台灣土地。這本詩集《記持開始食餌》，在我來看，就是柯柏榮這十冬來用這款決志，寫出來的詩集。
《記持開始食餌》，按照柯柏榮的整編，分做五系列，頭一卷「著等詩」收入的作品攏是這十冬以來得著文學獎的作品。無論是頭獎抑是佳作，論真來講，攏會得通看出伊寫詩的功力。伊寫賴何先；寫家的老母、外公；嘛寫南庄老街、打狗；閣寫監獄所想、所見……。遮的詩篇攏有誠深刻的思考，伊運用圖像思考、台語的聲韻，帶領咱綴伊的詩句，進入台語詩參台灣土地上?的境界，「佇街仔路、巷仔尾，都市、庄跤、教室、灶跤，流湠 / 流湠對土地掘出來的芳味」（〈夜讀賴和〉）這卷的每一首詩，就攏親像這句詩句仝款，予人入迷，予人感動！
第二卷收的詩，柯柏榮共號做「摃龜詩」，自我消遣，嘛誠心適。摃龜，就是無著獎，總共有十一首。文學獎本底就有侷限，也有缺憾，無仝的評審組合，選出來的得獎者佮作品就會無仝。無著獎的作品，未必然就是歹作品。柯柏榮將遮的詩抾倚來、抾做伙，檢采有伊的用意，囥佇詩集內底，會當予讀者做公親、做比較，有可能是伊的想法；將這卷參頭卷提來比並，無定著嘛會用當做是讀詩、論詩的一種趣味。
第三卷「山風聯寫」收十九首詩，多數攏是用自然生態表達詩人心境的好詩。遮的詩佮柯柏榮的監獄詩、參加文學獎的詩，毋但氣口無相仝，風格嘛無仝。比如〈秋芒初白〉這首寫秋天的菅芒花，嘛寫詩人家己的處境，「弄腰、伸勼、敧身 / 每一款舞步 / 每一?音符 / 攏咧刺憂頭結面的紋路」，菅芒佮詩人的身世相佮鬥做伙，用菅芒譬喻身世，外景佮內心互相呼應，是誠?氣的寫法。這也會當看出柯柏榮的柔情，毋是干焦會曉寫監獄詩的詩人。收佇落尾兩卷的「短情詩」參「零星詩」，嘛攏透濫有這款抒寫感情的大才情。
誠歡喜有這?機緣，代先拜讀柯柏榮這本詩集。這是一本共墜落的靈魂釘根佇台灣土地的好冊。向望柯柏榮繼續寫落去，寫出閣較濟好作品，用伊佮別人毋相仝的命運做底，用伊紲拍的台語，寫出新閣有味的景緻！
?
文 / 向陽
